Dörd ölkə Azərbaycan qazının Suriyaya nəqlinə dair birgə BƏYANAT YAYDI

Azərbaycan, Qətər, Suriya və Türkiyə Azərbaycan qazının Türkiyə ərazisindən Suriyaya ötürülməsinin başlaması ilə bağlı birgə açıqlama yayıblar.

Oxu.Az xəbər verir ki, Türkiyənin Enerji və Təbii Sərvətlər Nazirliyinin yaydığı bəyanatda bu layihənin dörd ölkə arasında əlaqələrin gücləndirilməsində vacib addım olduğu qeyd olunub.

Açıqlamada vurğulanıb ki, rekord müddətdə həyata keçirilən bu layihə Suriyanın münaqişədən sonrakı bərpa və normallaşma prosesi üçün xüsusi əhəmiyyət daşıyır.

Sənəddə qeyd edilib ki, bu təşəbbüs Suriya iqtisadiyyatının canlanmasına və əhalinin həyat şəraitinin yaxşılaşmasına birbaşa töhfə verən mühüm humanitar addımdır.

Bundan əlavə, iştirakçı ölkələr regionda sülhün, sabitliyin və rifahın möhkəmləndirilməsinə sadiq olduqlarını bir daha təsdiqləyiblər.